من أنا

صورتي
طبيب ومدون، ابدأ خطواتي نحو المشاركة السياسية والحقوقية، أعشق الهدوء والخط العربي والتصوير. dr_hossam_elamir@hotmail.com

الجمعة، 30 أغسطس، 2013

مبرراتي

كتب عمار ياسر:

تعالى أحكي لك قصتي معاك منك له .. ^_^

فاكر اليوم إللي اتقتل فيه محمد صبحي الحداد رحمه الله ؟! .. لأ مش فاكر !!!

طب أنا هفكرك :) .. ده الشهيد - بإذن الله - إللي وقف على بعد مترين من الأسلاك الشائكة إللي كانت بتحمي نادي ضباط الحرس الجمهوري وكان أعزل , بس كان شايل صورة لمرسي .. فاكر لما اتقتل انت قلت إيه ؟!

قلت إن الجيش مش ممكن يقتل , وحاولت تقنعني ساعتها إن الرصاصة إللي قتلته جاءته من الخلف !! , شفت الفيديو إللي واحد جزاه الله خيراً عمله عشان يثبت فيه إن الرصاصة كانت من الأمام ؟!

الراجل صاحب الفيديو عمل مجهود كبير لإثبات إن الرصاصة اخترقت جبهة محمد صبحي أولاً .. للأسف الراجل ده مكنش عارف إن بعدها بأقل من 48 ساعة هتحصل مجزرة نادي الحرس .. ومفيش حد هيبقى محتاج يتعب نفسه عشان يثبت إن الجيش عادي ممكن يقتل مصريين عزل !! .. بس فاكر يوم المجزرة دي قلت إيه ؟!

قلت إن المعتصمين حاولوا اقتحام منشأة عسكرية :D .. طب بس فين إللي انت قلته لي يوم قتل محمد صبحي - إن الجيش مش ممكن يقتل ؟!!!!
لا لا ما هو طلع ممكن يقتل إللي بيقتحموا النادي :D لأن النادي منشأة عسكرية .. طب ليه مقلتش من الأول قبل المجزرة ما تحصل ؟!!

أصل المقتحمين دول ( على فرض إن كان فيه مقتحمين أصلاً ) مش قادرين ينسوا منظر البلدوزر إللي كان عايز يهدم باب قصر الاتحادية ومحدش عمل له حاجة .. محدش قال لهم إن الكلام ده كان زمان !!

ما علينا .. فاكر مجزرة المنصة بعد كده ؟!! قلت إيه يومها ؟!!

قلت إن المتظاهرين حاولوا احتلال كوبري أكتوبر .. إيه ده ؟! يعني الجيش ( أو الشرطة ) طلع ممكن يقتلوا ناس عزل مش بتهاجم منشأة عسكرية ؟!!!!!
طب يا راجل مش تقول من الأول ؟!! :D

أصل الناس الغلابة إللي في الاعتصام قرروا الانسحاب من أمام نادي الحرس الجمهوري لأنهم فهموا منك إن نوادي الجيش خط أحمر .. طلع كمان الكباري خطوط حمرا !! :D .. بس انت برضه مقلتش موضوع الكباري ده من الأول على فكره .. انت قلته بعد القتل ما حصل .. وده فرق جوهري .. لأن السنتين ونص إللي فاتوا مكنش حد بيتقتل لما يحتل كوبري ( وده برضه بافتراض إن المتظاهرين احتلوا الكوبري لأني كنت هناك وأقول لك أن هذا كذب ) .. !!

انت دايماً بتحب تطلع بمفاجئات وتبريرات جديدة بعد القتل ما يحصل !! .. فاكر كمان يومها لما قلت إن الإخوان بيقتلوا نفسهم ؟!!

كانت أيام والله :D .. لأن يومها اعتقدت أنك فعلاً مقتنع بكده .. وكنت بجري وراك عشان أقنعك إن إللي انت بتقوله ده مش منطقي .. المهم .. مفاجئاتك مش بتخلص .. لأن بعد إللي الفجرة إللي انت بتأيدهم عملوه في رابعة والنهضة ..

مكنش ينفع تستعين بأي إجابة من إجاباتك الخايبة السابقة :
(1) الجيش مش ممكن يقتل !
(2) المتظاهرين حاولوا اقتحام منشأة عسكرية !
(3) كوبري 6 أكتوبر خط أحمر لأن احتلاله يعني شلل مروري تام بالقاهرة !
(4) الإخوان بيقتلوا نفسهم عشان يلزقوها في الجيش والشرطة !

_ فقررت تطلع بمفاجئة جديدة :D :
الإخوان معاهم أسلحة !! .. هممم... عارف انت ؟!!

أنا إللي غلطان بجد لأني باخد كلامك محمل الجد وبحاول أقنعك بخطئه ! .. الموضوع فعلاً مش مستاهل .. انت بتكذب من أول يوم .. وبتألف كذبة جديدة كل ما الكذب القديم يبقى خلاص مبياكلش .. فكر كده في تبريراتك من شهرين وتبريراتك إنهارده !! .. حاسس إنك متسق وأمين مع نفسك ؟!!!

عارف إيه الدليل رقم مليون إنك كذاب ؟! الستة وتلاتين إللي ماتوا بالغاز في عربية الترحيلات وتم حرقهم .. كذبة إن الإخوان معاهم أسلحة متنفعش هنا .. وطبعاً ولا أي كذبة من إللي قلتهم قبل كده تنفع :D .. طب نعمل إيه , نعمل إيه , نعمل إيه ؟!!

أيوه .. جيب سيرة الخمسة وعشرين عسكري إللي ماتوا في سيناء .. ولبس دي في دي واطلع منها سليم .. :D !!!!

متحاولش .. خليك أمين مع نفسك .. راجع كلامك ومعاييرك وتبريراتك .. هتعرف إنك ظالم .. وربنا ميرضاش بالظلم .. بس انت اتقل على رزقك ^_^

ليست هناك تعليقات: