من أنا

صورتي
طبيب ومدون، ابدأ خطواتي نحو المشاركة السياسية والحقوقية، أعشق الهدوء والخط العربي والتصوير. dr_hossam_elamir@hotmail.com

الجمعة، 11 مارس 2011

شعار المرحلة: اعمل جميل فنفسك ومتبقاش بغبغان...بدل ما تسمع رد وكلام حمضان

بصو يا جماعة، المره دي هتكلم بالبلدي يكشي حد يقرا، إخوانا اللي قاعدين عالفيس بوك والمنتديات،بما إننا في مرحلة جديدة، وقال يعني كلنا اتغيرنا وبالثورة اتأثرنا، يا ريت نتعلم حاجة جديدة تتناسب مع المرحلة.
ياما وصلنا ايميلات بأحاديث ننشرها، وآيات وبرده ننشرها، واكتشافات وخرافات علشان ننشرها، وكنا بنعمل فوروارد لكل الليست، أو ناخدها كوبي بيست، من غير ما ندقق فيها ولا نتأكد من محتواها، وبعد الثورة دخل عالخط موضوع مثير، الاتهامات ماليه النت من الرئيس للغفير، ورغم إن جزء كبير من الاتهامات دي اترد عليها مليون مرة، إلا إننا لسه بنعمل كده كإنه سبق صحفي.
تيجي أقولكم على اختراع لطيف، بدل ما تقول كلمة غلط وتخلي واحد زيي يرد عليك، وبعدين عيب لما واحد زيي يرد عليك، وكمان انت ما بتعرفش الكلام اللي بيتقال عليك من ورا ضهرك لما واحد زيي بيقعد مع ناس زيي، المهم علشان محدش زيي يتنطط عليك، اول ما تلاقي حديث مكتوب ولا آية قرآنية ولا خبر الموسم ولا أي كلمة وحبيت تعملها شير أو تبعتها، اعمل اللي بقولك عليه ده، افتح صفحة جوجل، واعمل كوبي بيست للحاجة اللي انت عايز تنشرها، ودوس على سيرش، وشوف مصدر الكلام ده، هتلاقي الحديث موضوع أو ضعيف أو بلفظ آخر، وهتلاقي الآية مكتوبة املائيا غلط، وهتلاقي الاتهام مالوش أساس، أو منقول من مقال مش من خبر، وطبعا الفرق بين المقال والخبر هنشرحه في نوت تانية علشان مش عايز تكدس معلومات، كفاية المعلومات الكتيرة اللي هنا، وربنا يعينك على تطبيقها، بس انا بطمنك ان الموضوع سهل بإذن الله، كل اللي عليك تعمله إنك تحط الكلام كوبي بيست في صفحة جوجل، (وانت أصلا مش بتعرف تعمل غير كده)، وبعدها تدوس سيرش (ودي خطوة صعبة شوية) وأخيرا إنك تقرا النتايج اللي تطلعلك (ودي تقريبا حاجة هتتعلمها من جديد إذا كنت أول مره في حياتك تتابع من بعد الثورة).
نقول تاني، ابوس ايديكم تدوروا على مصدر الأخبار اللي بتنقلوها، علشان أنا كده مش هلاقي حد أتكلم معاه.

ليست هناك تعليقات: