الكبير قوي

• المكان: دوار العيله

• الزمان: بعد السحور

• الحدث: ولاد أبو عقرب هدوا الحيطة اللي بينا وبينهم وجات على رمضان ومات

• الأشخاص:

الكبير قوي مالوش اسم

أبو دراع زعلان من الكبير بس جه علشان يشوف حل للمصيبة

السكيتي واحد مهزأ ومش بيزعل الكبير قوي
 

الخواجة واحد من بره البلد عايش من زمان هنا ومصاحب الكبير قوي
 

سيد وشوية ناس تانيين

• سيد: أيوه يا كبير، قول هنعملوا ايه؟ رمضان دمه غالي علينا
• الكبير قوي: آه والله، الفاتحة على روحه يا جماعة
• أبو دراع: دي عاشر مرة نقرو الفاتحة، سيبوله شوية سيئات يتحاسب عليها
• السكيتي: انت مبتحبش رمضان! عايزه يتعذب في القبر
• أبو دراع: بلاش إنت يا سكيتي، دلوقتي عرفت عذاب القبر! ده انت مبتركعهاش، ماشي وآدي فاتحة على روحه
• الكل يقرأ الفاتحة
• أبو دراع: ها هتعمل ايه؟
• السكيتي: انت بتكلم الكبير قوي كده حاف، خلاص مفيش أدب، ما هو ده اللي خلا الناس تستجري علينا، مش عايزين يبقالكم كبير يا لمامة
• أبو دراع: إتلك ياض ومش عايز نسمع صوتك، إخلص يا عم الكبير قوي قوي، انت هتختم القرآن على روح رمضان؟
• الكبير قوي: عايز أيه يا أبو دراع، إنت مش كنت زعلان وحلفت منتاش جاي الدوار تاني لحد ما نمشي منه، ولا حليت في عينك القعدة؟
• أبو دراع: قعدة أيه يا بو قعدة؟ وهو في حد قعدك هنا غيري؟ أنا لا عايز قعدات ولا عنقدر نستحمل العمة على دماغي، وبعدين ده مش موضوعنا، هنعملو أيه مع ولاد أبو عقرب؟
• الكبير قوي: إحنا مالنا ومالهم؟ إحنا مالناش صالح غير برمضان، ولا أيه يا خواجه؟
• الخواجه: كلامك مظبوط يا كبير، إخنا نسوف رمضان راخ هناك ليه الأول
• سيد: آه صحيح، هو راح هناك ليه؟
• أبو دراع: يا دين النبي؟ مش رمضان غفير البوابة؟ عايزينه يقعد فين؟ وبعدين مش ده بيتنا وإحنا أحرار نقعد مطرح ما نعوز؟
• سيد: آه صحيح، رمضان كان الغفير، بس هو مكنش بيروح يقعد عالبوابة قبل كده
• أبو دراع: مكنش بيروح وبقى بيروح، مش موضوعنا
• الكبير قوي: هو رمضان مكنش بيروح يقعد! إزاي الكلام ده؟
• الخواجة هامسا: بلاس تمثيل، إنت اللي قلتله ميروحش قبل كده
• سيد تعليقا على همس الخواجة في ودن الكبير قوي: هو بيقوله أيه؟ هو بيكلمه إنجليزي؟ طب ماحنا مش بنفهم إنجليزي!
• أبو دراع: هو يعني الكبير اللي بيفهم
• السكيتي: انت مش هتتعلم الأدب وتبطل تغلط في أسيادك يا أبو دراع؟
• أبو دراع: وعزة جلالة الله لو ما اتلكمتش وخرست لكون ماسكك وعامل فيك زي ما حصل مع كبيرك، فاكر يا كبير لما جلابيتك اتحشرت في الدراسة وراحت معوراك في ال... ولا بلاش، أهو من يومها مشفناش وقفة راجل منك
• سيد هامسا في ودن اللي جنبه: آه صحيح، ده من يوم تعويرة الدراسة والكبير قوي مبقاش كبير، ومن يومها وهو مصاحب الخواجة، وإحنا اللي فاكرين إن الخواجة عيصرف عليه علشان يتعالج وبس، أتاريه.. استغفر الله العظيم
• الكبير قوي: حد سأل ولاد أبو عقرب أيه اللي حصل؟
• أبو دراع: يا مثبت العقل والدين، هنسألهم على أيه وليه؟
• الخواجة: هما كانو بينضفو تحت الخيطه علسان في تعابين وعقارب، وبعدين الخيطة راخ وقعت على رمضان
• الكبير قوي: وليه محدش منضف الحيطة؟
• سيد: يا كبير إنت قلتلنا الناحية دي قبلي ومفيهاش سمس ولا هوا، ومحدش يقعد فيها، بطلنا نروح هناك لحد ما لمت التعابين والعقارب
• أبو دراع: يا عم إخلص، تعابين أيه وزفت أيه وهباب برك أيه، يعني هي جات عالتعابين، مانت مجاور ولاد أبو عقرب ذاتهم
• الخواجة: يعني نعملهم أيه؟ دول معاهم كونتراتو يا خبيبي
• أبو دراع: هو ميتين أم الكونتراتو ده مش ماشي غير علينا بس؟
• الكبير قوي: علشان إحنا الكبار لازم نلتزم بالكلمة، الحكاية مش سهلة والعيال متفهمهاش
• السكيتي وسيد وشوية ناس: الله عليك يا كبير، هو ده الكلام
• أبو دراع: يعني في الآخر هتعمل أيه؟
• الكبير قوي: هنعمل أيه في أيه؟ إنت ناسي إن دول ولاد عمنا فوق، والضفر ميطلعش من اللحم؟ عايز الدم يبقى ميه
• أبو دراع: ما هو بقا ميه خلاص، ورمضان راح
• واحد يدخل بسرعة وهو بيزعق: إلحق يا كبير، الشحات واد خالتك جايب ولاد عمه وعايز إردب قمح قال أيه علشان ياكلو
• الكبير قوي منتفضا من مجلسه: هي حصلت يعرنا قدام الناس ويطلع من الحوش، خلاص مبقاش لينا كرامة لو سكتناله، يا رويعي، هات الرجالة والسلاح