عرفنا الصح متأخر ..

حاجات في الفيزيا خدناها
و طِلِعت كِدب مش أكتر ..
عرفنا لمّا شُفناها
مع الأيّام بتتغيّر ..
علامنا كان غلط لكن
عرفنا الصح متأخر ..
و ليه الحق في الدنيا
يجيلُه الوقت يتبخّر ..
يلِّف اللفة و بيرجع
و يغلط زيّنا في الإسم
سكون الجِسم لا يعني
بإنه في الأساس خامل ..
سكون الجسم أحياناً
بيبقى من وجع شامل ..
و تطلع م الوجع طاقة
تهد فـ حيلنا بالكامل ..
و تقلِب نفسِنا علينا
سكون الجسم في الفيزيا
مهوش زي السكون فينا !
سكوننا تملي يبقى لتحت
ولا عُمرُه بيبقى لفوق ..
سقوط الضوء على عُنصر
بيعكس ع العيون لمعة ..
لكن جرّب تعيش مَرّة
ضلام ليلَك على شمعة ..
و دقق في الوشوش جنبك
هتلمح في العيون دمعة ..
و تلمح جنبها مرارها
سقوط الضوء على الحاجة
بيكشف كل أسرارها !
و بيوضّح و بيكَبَّر
و نِكبر إحنا و نلاقي
حاجات في الفيزيا خدناها
بتخدعنا و تتغيّر ..
علامنا كان غلط لكن
عِرفنا الصَح مِتأخّر ..

#فيزيا
#نبيل_عبد_الحميد
قلم رصاص